上山下海第一站（南宁）

yy

本以为7～8个钟就可以到南宁，点Q知到达嘅时候算咗下，竟然係坐咗11粒钟！车上係咁播电影，我都唔记得睇咗几多部喇，由于车上有唔少一家大细，坐言起行要处处小心，自然缺少欢声笑语，呢11个钟头都几恶顶下 坐后座就唔顾得咁多仪态喇，最紧要係梳扶 顺住呢条民族大道进入南宁市区，感觉呢度嘅绿化规划真係一流 哇！估下係边个只飞毛腿？ 俾人搞到出晒水唔突止，仲要Gel起晒啲毛毛 临尾仲要做埋结扎手术，问你死未？

[此贴子已经被作者于2005-8-15 19:37:04编辑过]

yy

第二朝7.morning call，已经够晒阴公，睡眼矇松咁上咗车，一路上乌眉瞌睡，直至进入山区先好似只田鸡咁弹起身！啲景色好靓啊！！！乜眼训虫都赶且晒 真係名副其实嘅山卡拉地方 青山绿水，心旷神怡 到达靖西嘅第一项活动就係去古龙山峡谷漂流，沿途一路都係悠哉游哉，冇乜惊险，想刺激啲嘅话都係去怀集好 太阳好晒，啲水好凉 呢个漂流最大特色莫过于要穿过三个黑萌萌嘅岩洞，正当我摞住电筒四周围寻觅蝙蝠踪迹嘅时候，船夫叫我照右边，哇！好大碌嘢啊！真係似到十足十，撞鬼咯！ 历时个半钟嘅漂流，船夫撑一次先赚15蚊，真係血汗钱嘅最佳写照 跟住嚟到中越边境，近处係我国的国旗。 条坑渠嗰边就已经係异国他乡喇 我地喺中越界碑前纷纷留影嘅时候，越南方面表现得异常紧张，只要我地一跨进越南领土，即刻有人出嚟干预 在边境逗留片刻后，又马不停蹄地赶到岳圩镇，探访我们扶助嘅小学 屋檐下的粟米 整翻个特写 呢间小学经过数次装修，已经旧貌换新颜 一个残旧嘅篮球场+几张砖头砌成嘅烂ball台，承载咗小朋友无数嘅欢乐 焕然一新嘅教学楼，俨然不知已有二十五年光景了 凌乱嘅办公室，可以讲係教师呢一行嘅特质 当晚大排筵席，在常人眼中嘅普通菜肴，已经係当地最高级别嘅款待，最深印象係嗰碗七彩糯米饭，个卖相认真一流，不过食落口就硬到无伦，好彩我係咁咦食一两啖，难为嗰啲装咗满满一大碗嘅人，真係头都痕埋。唔饮酒嘅我，收尾仲要俾自己友局我队咗一大碗漓泉

[此贴子已经被作者于2005-8-13 10:01:19编辑过]

yy

今日仲惨！6.就要起身，何止阴公咁简单，上咗车直头要揾周公啊Zz....z.zz.....zz 嚟到德天瀑布，先被告知限时游览一个钟，即刻打部电磁车上山顶，上到去原来又係中越边境，我方有一个边防警察在维持秩序，与我方人声鼎沸嘅情形相比，石级嗰边嘅越南则是冷冷清清 左边嗰几条水柱係越南嘅板约瀑布，右边气势磅礴嘅就係我国嘅德天瀑布喇！听讲以前係可以踏足越南国土嘅，不过依家又唔俾喇 沿住小路往下走，眼见一股股潺潺细流汇聚成滔滔急流 愈发湿滑嘅梯级，愈发寒凉嘅水气，意味着即将和瀑布来一次亲密接触喇 踏上竹筏，瀑布，我来了！ 越南板约瀑布 中国德天瀑布 从竹筏落嚟，猛然发现自己已失身，加上时间无多，鸡咁脚跑落山，沿途见到咁靓嘅花又忍住影咗两张，呢铺死喇！突然想起屋企人要嗰啲手信，喇喇临见到乜就买乜，翻到上车成个师奶咁，狼狈到死，后来更发现原来喺某个档摊买嘢俾咗钱唔记得摞添！ 匆匆离开山区，直奔北海，沿途景象，不过我係乖仔嚟，极少去呢挺地方 嚟到银滩，远远就见到入口处嘅大ball 行近再睇真啲，先知道原来ball外有ball

[此贴子已经被作者于2005-8-12 17:29:00编辑过]

yy

黄昏时分嘅北海适逢涨潮，海天一线嘅感觉真係美妙！ 海面频频刮浪，海滩上嘅游人玩得不亦乐乎 狼来了！！！ “咦，嗰边有个着三点式嘅姐姐喔！” “企起身睇真啲先，哎呀！条泳裤甩咗添！！” 可惜时间有限，逗留咗一阵就去咗食沙虫，嗰间up dup餐厅嘅沙虫仲要係限量供应，可见其在当地知名度甚高，酒足饭饱之后，翻到下榻嘅酒店仲係觉得意犹未尽，晚黑再约三五知己重踏银滩，晒月光、吹海风、劈漓泉，大讲咸湿嘢、劲唱咸湿歌，吓到邻座啲游人落荒而逃，有人趁着醉意嚟一锅“爸爸与我看着海浪，与我一起对浪小便……”更有人醉到瞥瞥夫都仲要登上个鬼咁高嘅瞭望塔，“咦，点解上面咁多个环（救生圈）嘅？”跟住救生员每日嘅上岗就俾我地班人戏称为……

第二日一早又风尘仆仆咁赶往湛江，嚟到避风港坐快艇，体验一下风驰电制嘅快感 坐稳啊，开船喇！ 随波逐浪的小鱼儿，又咸又腥的海风，令我们兴奋异常 锈渍斑斑嘅渔船，记录下多少岁月的沧桑 海浪把战舰轻轻地摇～～ 当天晚饭完毕本来想行下夜街，点知又俾人抓咗去唱K，仲要俾人灌咗成肚水，冇劏到经已好叻

[此贴子已经被作者于2005-8-13 22:26:18编辑过]

yy

第二日嚟到行程嘅最后一站：东海岛，我们在这里畅泳，不过与浪滔滔嘅北海银滩相比，呢度真係逊色多了 晚饭完毕之后仲摞咗只蟹走去海边，喺沙滩上边走边食，食到子宫都损埋，唸翻起都觉得好味！跟住又转咗三个场食叹烧生蚝，食到咀烂都仲继续食 百无聊赖之下砌个沙堆玩下，估下边只手板係我哩？ 天生一对？ 消完夜已经凌晨三点，翻到别墅打几盘拖拉机，吹一轮水，不知不觉，又到五点，一班熊猫又再死出去睇日出，自制浪漫一下，嗱，顺住阿边个边个只脚指住嗰个方向就係东方喇，只不过尚未见红 黎明前的黑暗 曙光初现 耐心等待 见到云越积越多，虽有几分忧心，但内心仍期盼着有奇迹出现 顶佢个肺吖，老天爷玩嘢！ 晨曦小富士 临走前再同富士山留翻张倩影先 一众熊猫怀着失落嘅心情翻别墅嘅时候，遇啱赶出嚟睇日出嘅团友，人地向我地叫声“早晨！”得到嘅回应竟然係“早抖！”

[此贴子已经被作者于2005-8-13 18:50:31编辑过]

audio

你殊殊的地方呢？

鲜橙多235

三站四站五站的图呢？

紫蝶泉

等你个PP真系费晒劲！

TOM

本以为7～8个钟就可以到南宁，点Q知到达嘅时候算咗下，竟然係坐咗11粒钟！

唔系你估。坐车都叫苦，你试过揸车去未呃？

audio

车上係咁播电影，我都唔记得睇咗几多部喇，由于车上有唔少一家大细，坐言起行要处处小心，自然缺少欢声笑语，呢11个钟头都几恶顶下

戴住我的“蓝魔”，仲恶顶？